Smellið á myndina til að sjá hana stóra
(Myndin er úr bókinni Ættartala úr Suðursveit, með góðfúslegu leyfi höfundar)

Vigfús Sigurðsson fæddist þann 16. nóvember 1880. Sigurður faðir Vigfúsar og Sigurður faðir Ara á Borg voru hálfbræður, sammæðra.

Vigfús var trúlofaður Sigríði Gísladóttur áður en hún giftist Ara á Borg. Þau voru þá bæði vinnuhjú í Hoffelli. Vigfús drukknaði í Hornafjarðarósi þegar Sigríður var gengin fjóra mánuði á leið með barn þeirra. 

Slysinu og aðdraganda þess er lýst svo í endurminningum Þorleifs Jónssonar í Hólum:

Þetta vor, 1911, rak allmikinn hafís hér suður fyrir Hornafjörð, fyllti ósinn og rak inn um fjörð. Þetta var síðustu dagana í apríl.
Strandferðaskipið Perwie var þá á suðurleið, og tókst henni að fika sig um vakir og sund inn á ósinn og lagðist þar í lægi 5. maí. Hinn sama dag flýði franskt spítalaskip inn á ós undan ísnum.
Næstu daga var ísinn svo þéttur, að ekki voru tiltök að komast út. Einhvern daginn lagði spítalaskipið til, en festist í ís og rak upp á eyri. Bátaferðir voru tíðar milli kaupstaðarins og skipanna, einkum í Perwie að flytja fólk, farangur og vörur milli, bæði árabátar og einnig mótorbátar. Hinn 10. maí vildi það slys til, að Vigfús Sigurðsson, vinnupiltur frá Hoffelli, drukknaði í firðinum. Var hann á mótorbát eða uppskipunarbát, og strandaði báturinn eða festist á grynningu. Setti Vigfús sig út að kanna, hvar dýpi væri, og óð sig í kaf, áður en nokkur vissi; hefur ekki varað sig á, að örskammt frá bátnum snardýpkaði. Fannst hann brátt, en var þá liðinn, þótt brátt næðist í lækni til að gera lífgunartilraunir.

Eftir dauðsfall Vigfúsar fór Sigríður heim til foreldra sinna að Viðborði. Barn hennar og Vigfúsar fæddist 9. október 1911, það var drengur og var hann látinn heita Vigfús eftir föður sínum. 

Síðar kynntist Sigríður Ara á Borg, þegar Vigfús Vigfússon var enn aðeins smábarn. Ari gekk honum í föðurstað og Vigfús leit alltaf á Ara sem pabba sinn, enda þekkti hann aldrei til föður síns. Vigfús ólst svo upp með hálfsystkinum sínum, börnum Ara og Sigríðar.