Smellið á myndina til að sjá hana stóra

Ari bjó að Borg á Mýrum, Austur-Skaftafellssýslu. Eiginkona hans var Sigríður Gísladóttir (gift 5. nóvember 1916). Börn þeirra: Sigurður f. 1916, d. 1943; Gísli Ólafur f. 1917; Fjóla f. 1919; Guðjón Sigurður, f. 1921; Lilja f. 1922; Ástvaldur Hólm f. 1924; Steinunn f. 1926; Ragnar Guðmundur f. 1928; Jón f. 1929; Hólmfríður f. 1933. Fyrir átti Sigríður soninn Vigfús f. 1911, d. 1975. Faðir hans var Vigfús Sigurðsson (1880-1911).

Ari fæddist þann 13. maí 1891 á Borg á Mýrum. Hann lést þann 3. júní 1957, 66 ára að aldri.

Ari stundaði Verslunarskólanám einn vetur, um 1910. Samkvæmt Gísla og Ástvaldi, sonum Ara, var hann mikið menntamannsefni og talinn mjög næmur á bókina. Fríða dóttir Ara orðaði það þannig að Ari hefði verið mjög bókhneigður.

Eftir þennan eina vetur í Verslunarskólanum talaði Ari Norðurlandamálin, skildi og talaði svolitla ensku, og skildi þýsku. Eftir að hann kom heim úr námi hélt hann áfram að lesa þessi tungumál og stundaði sjálfsnám.

Það lá ekki fyrir Ara að fara í frekara nám, hann var kallaður heim. Þrátt fyrir að Ari ætlaði sér aldrei að verða bóndi, voru hans örlög að taka við jörð og ævistarfi föður síns. Eða eins og Gísli orðaði það:

...gamlir bændur, þeir skildu það ekki að það væri til eitthvað annað en að vera bóndi.

Bóndi á Borg á Mýrum, barnakennari í Mýrahreppi og smiður. Ari átti einnig hlut í einum bát og var formaður fyrir bátnum. Hann var um tíma organisti í Mýrakirkju.

Ari hafði mjög mikinn áhuga á tónlist og smíðum. Hann spilaði á orgel og var mikið fyrir söng. Orgelleikinn lærði hann sjálfur af þýskri bók.

Í sveitinni var starfandi um tíma sósíalistafélag, og Ari stofnsetti þar kór og stjórnaði honum. Það sem Ari lærði á hljóðfæri, lærði hann af sjálfum sér.

Ari var mjög hagur smiður. Hann smíðaði bæði stórt og smátt, húsgögn, báta og ýmsa smámuni.

Ari var mjög virkur í hvers kyns félagsstörfum. Sökum þess að hann var þó þetta skólagenginn, var hann oft látinn halda skrifaða ræðu á samkomum í sveitinni.